Naghain ng petisyon ang apat na miyembro ng Cordillera People’s Alliance (CPA) sa Baguio City Court upang kuwestiyunin ang pagbansag sa kanila bilang mga terorista, pati na ang ligalidad ng Anti-Terrorism Act.
June 2023 nang bansagang terorista ng Anti-Terrorism Council (ATC) ang mga katutubong sina Windel Bolinget, Sarah Abellon-Alikes, Jennifer Awingan-Taggaoa, at Stephen Tauli, at “frineeze” ng Anti-Money Laundering Council (AMLC) ang kanilang assets.
Una nang hiniling ng petitioners sa ATC na alisin ang kanilang mga pangalan mula sa listahan sa pamamagitan ng proseso na tinatawag na delisting, subalit ibinasura ng konseho ang kanilang request.
Tinukoy ang ATC at AMLC bilang mga respondent sa inihaing petisyon sa korte.
Iginiit ng petitioners na simula nang maitatag ang CPA ay hindi ito nagsilbing legal front ng Communist Party of the Philippines-New People’s Army (CPP-NPA) o alinmang local o international terrorist organization.
