NAHARANG ng Bureau of Immigration (BI) ang labing apat na indibidwal na pinaniniwalaang biktima ng human trafficking, at umano’y na-recruit na magtrabaho sa scam hubs sa ibang bansa.
Ayon sa BI, ang unang grupo ay binubuo ng tatlong indibidwal na edad, 33, 25, at 27, na napigilan sa Ninoy Aquino International Airport terminal 1 noong feb. 4 habang pasakay sa Philippine Airlines flight patungong Thailand
Inamin ng tatlo na ni-recruit sila na mag-trabaho sa Cambodia bilang customer service representatives para sa isang iligal na business process outsourcing (BPO) company.
Nang sumunod na araw ay naharang naman ng immigration officers ang labing isa pang indibidwal na nasa mid-20s ang edad, sa NAIA terminal 1, na patungo sa Bangkok, Thailand.
Nagpanggap naman ang mga ito na mga estudyante subalit dahil sa magkakaiba nilang mga pahayag ay nadiskubre na pinangakuan sila ng buwanang sweldo na 50,000 pesos para magtrabaho sa iligal na BPOs sa Pakistan.
