Senado, nagpalit ng liderato; Sotto, out, Cayetano, in

TULUYAN na ngang napatalsik sa puwesto si Senate President Tito Sotto III.

Labingtatlo ang bumoto ng “YES” para mabakante ang lahat ng posisyon sa Senado, kabilang ang liderato o ang pagiging Senate President.

Sampu naman ang bumoto ng “NO”, habang isa ang abstention.

Agad nagmosyon si Senator Imee Marcos na mahalal para maging senate president si Senator Alan Peter Cayetano.

At dahil wala namang tumutol, ganap na ngang na-elect si Cayetano bilang pinuno ng Senado.

Para kay Senator Tito Sotto III, malaki ang kinalaman ng impeachment sa nangyaring kudeta sa Senado na nagresulta sa pagpapatalsik niya sa puwesto bilang senate president.

Matapos ang botohan para mabakante ang lahat ng puwesto sa Senado, sinabi ni Sotto na may malaking posibilidad na may kaugnayan ito sa impeachment.

Aniya, ilang beses na rin niyang sinabi sa mga panayam na sa sandaling makarating sa Senado ang articles of impeachment laban kay Vice President Sara Duterte, ay agad na mag-co-convene ang Mataas na Kapulungan bilang impeachment court.

Kahit napatalsik siya sa puwesto, sinabi ni Sotto na hindi nababago ang kaniyang posisyon tungkol dito. 

Bilang ngayon ay minorya na sa Senado, patuloy aniya nilang itutulak ang pag-convene bilang impeachment court kapag umabot sa Senado ang articles of impeachment laban sa bise presidente.

Samantala, hindi na nagulat si Sotto sa nangyari, dahil ayon sa kaniya bilang senate president, handa sa anumang posibleng mangyari.