Magnitude 6.9 na lindol yumanig sa Bogo, Cebu; bilang ng nasawi umakyat na sa 69, state of calamity idineklara

Isang malakas na magnitude 6.9 na lindol ang tumama sa bahagi ng northern Cebu kagabi, Setyembre 30 bandang 9:59 PM. Ang epicenter ay naitala sa northeast ng Bogo City ayon sa PHIVOLCS, at ito na raw ang pinakamalakas na lindol na tumama sa Cebu sa kasaysayan.

Niyanig ang buong Bogo at kalapit na bayan tulad ng San Remigio, Medellin, at Tabuelan. Maraming gusali ang gumuho o nagkaroon ng matinding pinsala kabilang ang mga bahay, simbahan, at ilang government buildings. Sa San Remigio, bumagsak ang isang sports complex habang may laro, kung saan ilan ang nasawi at marami ang nasugatan.

Sa pinakahuling datos, nasa mahigit 69 na ang kumpirmadong nasawi at higit 150 ang sugatan. Patuloy pa ring hinahanap ang ilan pang mga nawawala habang nagpapatuloy ang rescue at clearing operations. Puno na ang Bogo Provincial Hospital kaya’t dinala na rin ang ibang sugatan sa mga temporary treatment sites.

Nadama rin ang ilang malalakas na aftershocks, kabilang ang magnitude 5.0 bandang 10:24 PM. Dahil dito, pinag-iingat ang mga residente na huwag munang bumalik sa mga nasirang bahay o gusali dahil posibleng magdulot ng karagdagang sakuna.