IPINAG-utos ni Transportation Secretary Vince Dizon ang pagbawi sa lisensya ng taxi driver na nahuli sa viral video na naningil sa kanyang mga pasahero ng 1,260 pesos na pasahe mula NAIA Terminal 3 patungong Terminal 2.
Ayon kay Dizon, inatasan na niya ang Land Transportation Franchising and Regulatory Board (LTFRB) at Land Transportation Office (LTO) na kanselahin ang registration ng driver at prangkisa ng operator.
Sinabi ni Dizon na hindi siya naniniwalang hindi alam ng operator ang modus ng driver, at malamang at matagal na nila itong ginagawa.
Nanawagan din ang kalihim sa publiko na ipagpatuloy ang pagsusumbong laban sa mga driver na naniningil ng sobra-sobrang pasahe, at inirekomendang gumamit ng Transport Network Vehicle Service (TNVS) o Ride-Hailing Applications.
