Globe may pinakamalakas na network performance ngayong 2026 — DICT

MANILA— Globe Telecom, naitala ang pinakamalakas nitong network performance ngayong 2026 matapos makuha ang pinakamataas na overall score at pinakamabilis na average download speed noong Agosto, ayon sa pinakahuling Telco Report Card ng Department of Information and Communications Technology (DICT).

Batay sa ulat ng ahensya, nakapagtala ang Globe ng overall score na 81.5, na mas mataas ng 4.4 puntos kumpara sa Enero.

Umabot naman sa 45.9 Mbps ang average download speed nito, ang pinakamataas na naitala ngayong taon.

Mas mabilis ito ng 5.1 porsyento kumpara sa Hulyo at 26 porsyentong mas mataas kaysa sa 36.5 Mbps na naitala sa simula ng taon.

Tumaas din ang network quality score ng Globe sa 71.2 mula sa dating 69.2, habang nanatiling nasa 20 milliseconds ang latency.

Ayon sa Globe, bunga ito ng patuloy nitong pamumuhunan sa network infrastructure at pakikipagtulungan sa pamahalaan, kabilang ang National Telecommunications Commission (NTC), upang mapahusay ang kalidad ng telecommunication services sa bansa.

Patuloy na nakikipagtulungan ang NTC sa mga telecommunications provider upang mapabuti ang serbisyo at mapalakas ang internet connectivity para sa mga Pilipino.

Kabilang sa mga inisyatiba nito ang tuloy-tuloy na network investments, technology upgrades at iba pang hakbang ng Globe para mapaganda ang customer experience lalo na sa mga lugar na limitado pa rin ang koneksyon.

“Customers need a network they can depend on every day, and that goes beyond speed.

It means being able to stay connected consistently, including during periods of high demand, disruptions, and emergencies,” ayon kay Globe General Counsel Atty. Froilan Castelo.