Pagkukumpuni sa 2 tulay sa Eastern Samar, pinabibilisan sa DPWH ng Provincial Government

NANAWAGAN ang Eastern Samar Provincial Government sa Department of Public Works and Highways (DPWH) na bilisan ang pagkukumpuni sa dalawang mahahalagang tulay, dahil pinalalala ng load limits ang krisis sa langis sa lalawigan.

Sa statement, inihayag ng Provincial Development Council (PDC) na aprubado na ang resolusyon na humihiling sa DPWH na tibayan ang Coticot Bridge sa bayan ng Giporlos at Lawaan Bridge sa bayan ng Lawaan.

Ang dalawang luma at nasisira na tulay sa kahabaan ng main route na nag-uugnay sa Tacloban City patungong commercial districts sa Eastern Samar ay isinara sa mga sasakyan na may bigat na mahigit limang tonelada simula noong March 11.