ISANG motorcycle rider na pumasok sa EDSA carousel bus lane ang naaksidente sa EDSA Ortigas-Southbound bago dumating sa flyover.
Agad naman itong nirespondehan ng mga traffic personnel ng Metropolitan Manila Development Authority.
Sa monitoring ng CCTV camera sa MMDA, ang aksidente ay nagdulot ng matinding traffic sa kahabaan ng EDSA.
Dahil dito, muling nagbabala ang ahensya sa mga pribadong motorista at motorcycle riders na huwag dumaan sa EDSA bus carousel lane.
Paalala ng MMDA, hindi ito fast lane kundi eksklusibo lamang sa mga pampasaherong bus, ambulansiya, at markadong sasakyan ng pamahalaan na rumeresponde sa mga emergency.
