Pag-ban sa Facebook, “last resort” sa gitna ng pangamba sa posibleng mapaminsalang content at pang-aabuso sa online

MAIKU-konsidera lamang ang pag-block sa Facebook sa Pilipinas bilang “last resort” sa gitna ng mga pangamba kaugnay ng posibleng mapaminsalang content nito at pang-aabuso sa online.

Pahayag ito ni Department of Information and Communications Technology (DICT) Sec. Henry Aguda, kasabay ng paliwanag na gagamitin muna ng pamahalaan ang lahat ng available na hakbang upang obligahin ang mga platform na sumunod sa mga kahilingan na naglalayong protektahan ang mga Filipino users, partikular ang mga bata.

Sinabi ni Aguda na nangyari na ito sa TikTok, at epektibo ang kanilang ginawa, kaya kung mapapansin ay walang masyadong problema sa naturang platform.

Natukoy aniya ng DICT ang dalawang major issues na kinasasangkutan ng Meta, ang kumpanyang nasa likod ng Facebook.

Una na rito ay ang identity verification na kailangan upang matulungan ang mga awtoridad na matukoy ang mga user na gumagamit ng fake accounts o troll accounts para makagawa ng pang-aabuso sa online.