HINDI ginamit ang Trust Fund ng Overseas Workers Welfare Administration (OWWA) sa hindi awtorisadong 1.4-Billion Peso Land Acquisition Deal sa ilalim ng Department of Migrant Workers (DMW).
Pahayag ito ni Palace Press Officer Undersecretary, Atty. Claire Castro, batay sa inisyal na pagsisiyasat sa naturang isyu.
Una nang sinibak sa pwesto si OWWA Administrator Arnell Ignacio, kasunod ng paggamit ng Public Funds para sa pagbili ng lupa, na plano nitong pagtayuan ng pasilidad para sa Repatriated Overseas Filipino Workers, ayon kay DMW Secretary Hans Leo Cacdac.
Binigyang diin naman ng kalihim na hindi inaprubahan ng departamento ang proyekto, dahil hindi naman aniya kailangan ng pamahalaan na magkaroon ng sariling lodging facility para sa mga OFW.
Idinagdag naman ni Castro na sa ngayon ay under investigation ang lahat upang malaman kung mayroon pang ibang mga opisyal na sangkot sa naturang kontrobersiya.
