Mga manggagawa na magiging exempted sa buwis, aabot na sa 29M kapag naitaas ang ceiling sa tax exemption

AABOT sa halos apat na milyon ang dagdag na makikinabang sa income tax exemption sa sandaling maisabatas ang pangako ni Pangulong Ferdinand Marcos Jr. na itaas ang ceiling para sa mga manggagawang exempted sa pagbabayad ng buwis.

Sinabi ni House Ways and Means Committee chair Rep. Miro Quimbo na sa kasalukuyang umiiral na batas, mayroon nang 24.5 million na manggagawa ang exempted sa pagbabayad ng income tax.

Ito ay ang mga mga minimum wage earners na sumusweldo ng hindi tataas sa 250,000 kada taon. 

Batay sa utos ni Pangulong Marcos sa kaniyang SONA, nais nitong magpasa ng batas para i-exempt na rin sa buwis ang mga manggagawa na kumikita ng hindi tataas sa 350,000 kada taon. 

Mangangahulugan ito ayon kay Quimbo ng dagdag na halos apat na milyon pang manggagawa na makikinabang sa income tax exemption.