Mga Empleyado Humiling na Maisabatas na ang 30% Calamity Premium Pay

HUMILING ang mga empleyado at kapamilya ng mga empleyado mula sa iba’t ibang sektor na maisabatas na ang calamity pay bill matapos ang sunod-sunod na hagupit na kanilang dinanas dulot ng Habagat at mga Bagyong Luis, Maymay at Neneng.

Ang tinutukoy nila ay ang Calamity Pay Bill o House Bill No. 4435 na isinusulong ni TRABAHO Party-List, magkakaroon ng karagdagang 30% premium pay sa regular na sahod ng lahat ng empleyado pumapasok sa trabaho tuwing may kalamidad.

Paliwanag ng may-akdang si Congw. Johanne Bautista, ang pagbibigay ng calamity premium pay ay isang patas at makatarungang kompensasyon na kumikilala sa panganib sa buhay at sakripisyong sinusuong ng mga empleyado para lamang makapaghatid ng serbisyo tuwing may kalamidad.

Komento ng netizen na si Aristotle, “Okay yang may additional pay. Hindi yung isang pirasong donut o isang turon lang ang makukuha pag sinuong ang kalamidad. Madalas wala pang makuha.”

“Eto yung gusto ko. Bagay na bagay sa nagtatrabaho sa mga sales industry,” komento ni C. Ambrocio.

Sabi naman ni Arthur, “Fair share” ito para sa parehong manggagawa at kumpanya. Sisipagin ang mga manggagawa na pumasok sa kabila ng kalamidad dahil sa mga benepisyo.