PATAY ang isang mayoral candidate, kasama ang tatlo pang indibidwal matapos pagbabarilin habang nangangampanya sa Mexican State ng Veracruz.
Nakunan sa Facebook livestream ang malagim na pangyayari habang binabati ni Yesenia Lara Gutierrez ang mga residente habang pumarada sa kalsada ng Texispec, kasama ang kanyang mga supporter.
Masayang sumisigaw ang mga tao nang biglang magulo ang kuha ng camera saka narinig ang nasa dalawampung putok ng baril sa video.
Kinumpirma ni Mexican President Claudia Sheinbaum ang naturang pag-atake, kasabay ng pagsasabing wala pa siyang impormasyon tungkol sa motibo.
