INIURONG ni Senador Francis “Kiko” Pangilinan, at kanyang misis na si Megastar Sharon Cuneta ang kanilang Cyberlibel Complaint laban sa Entertainment Columnist na si Cristy Fermin, kasunod ng Out-of-Court Settlement.
Sa statement mula sa opisina ni Pangilinan, nakasaad na nagkaroon ng Settlement ang magkabilang partido sa pamamagitan ng “Mediation Procedure,” na pinagtibay ng Makati Regional Trial Court Branch 148.
Inihayag ng abogado ng senador na si Atty. Maria Fricela Kim, na dahil hindi na makapagpatuloy ang prosekusyon nang walang kooperasyon ng Private Complainants, nagpasya ang hukom na idismis ang kaso bunsod ng kakulangan ng ebidensya at idineklarang Not Guilty si Fermin.
Mayo nang nakaraang taon nang magsampa ang mag-asawang Kiko at Sharon ng Cyberlibel Complaint laban kay Manay Cristy dahil sa naging pahayag nito sa kanyang online show.
Oktubre nang kasuhan ang Showbiz Columnist ng Five Counts ng Libel, at naglagak siya ng piyansa sa mga kasong dinala sa Regional Trial Court.
