Death toll sa mga bagyo at Habagat, sumampa na sa 34, ayon sa OCD; halaga ng pinsala sa agrikultura, lumobo na sa P2.84-B

NADAGDAGAN pa ang bilang ng mga nasawi sa pinagsamang epekto ng mga Bagyong Luis, Maymay, at Neneng, pati ng Habagat, ayon sa Office of Civil Defense.

Batay sa pinakahuling update, umakyat na sa tatlumpu’t apat ang death toll, kung saan pinakamarami ang nasawi sa Benguet na nasa labinlima.

Nakapagtala rin ng tig-apat na fatalities ang Rizal at Batangas, tatlo sa Caloocan, tig-dalawa sa Quezon at Occidental Mindoro, habang tig-isa sa La Union, Pangasinan, Oriental Mindoro, at Negros Occidental.

Labinsiyam naman ang nasugatan habang tatlong iba ang nawawala dahil sa masamang panahon.

Samantala, nakapagtala ang agricultural sector ng 2.84 billion pesos na pinsala at pagkalugi dahil sa pananalasa ng Habagat at mga Bagyong Luis, Maymay, at Neneng.