Pormal na nga iginkarawat san mga kaapi san Longsob United Farmers Association o LUFA an solar power equipment nga iginhatag ngan igin istalar gihapon Department of Agriculture, sa ilarum san Special Areas for Agricultural Development o SAAD Program.
Sumala san nakuha nga informasyon san IR News tikang kan City Veterinary Officer Dr. Edith Ancheta, daku kaupay an nahibubulig san nasabi nga solar power equipment agud mapadalagan an mga incubator san na eksister na nga Poultry Production Project para san native chicken ngan layer chicken sa nasabi nga barangay, ngan madugngan an kita san mga mag-uuma.
Presente agud ig tubyan an nasabi nga mga kagamitan ngadto san mga miembro san LUFA sa pangunguna ni Punong Barangay Resty Edraga ngan LUFA President Manuelito Julaton mao sira Agricultural Program Coordinating Officer Jason Fabillar, SAAD Provincial Coordinator Jeric Afable, City Administrator Agosto Magdaraog nga nag representar kan City Mayor Raymund Uy, staff san City Veterinary Office, ngan Program Officer Rowena Juanillo san Western Samar Development Foundation o WESADEF.
Nag instalar naman ngan nagtutdo kun paanano gamiton an incubator mao sira farm supervisor Dr. Jason Nuῆez san CVO ngan SAAD Area Coordinator Jafar Pansoy.
Mahinunumduman nga may usa naka tuig an naglabay, an LUFA an na organisa san magin benepisyaro san kanan German Government Karl Kubel Stiftung o KKS “Sustainable Improvement of Living Conditions of Disadvantaged Families ,” Project nga igin implementar san WESADEF. Labot san mga manok, igintagan liwat an pamilya san mga mag-uuma san mga baboy, karabaw, pato o itik, ngan mga seedlings san mga utanon ngan palay.
Sa pagkayana, usa na nga sustenable nga pakabuhi an pag uma ngan pag ataman san mga farm animals para san Brgy. Lungsob. Labot san pagbaligya san mga produkto san ira uma, nahimo na nga mapadamo san mga miembro san LUFA an farm animals nga iginhatag sa ira, ngan andam na nga igpasa ngada san iba pa nga panibag-o nga mga benipisyaryo. Tikang naman san na eksister nga layer chicken project san LUFA, nakahimo na pagpalit san panibag-o nga 200 ka bug-os nga parag bunay nga mga manok an LUFA, nga mao an nag buena-mano pag gamit san incubator nga igin papa andar san bag-o nga gin instalar nga solar power equipment.
