AABOT sa 11,592 na mga batang hirap makabasa, mga magulang at mahihirap na college students sa Eastern Visayas ang nakinabang mula sa Expanded Tara, Basa! Tutoring Program ng Department of Social Welfare and Development (DSWD) ngayong taon.
Sinabi ng DSWD na sinuportahan ng programa ang 1,512 college students na nagsilbing tutors at Youth Development Workers, 5,040 struggling readers, at 5,040 parents at guardians.
Layunin ng programa na ipinatupad sa 132 public schools sa Tacloban City, Ormoc City, at lalawigan ng Samar, na tugunan ang reading challenges habang nagbibigay ng financial assistance sa low-income college students.
Ang mahihirap na estudyante sa kolehiyo ay kinukuhang tutor sa mga batang hirap o hindi makabasa at nagsasagawa rin ng Learning Sessions para sa mga magulang.
Kapalit nito ay makatatanggap ang estudyante ng arawang sweldo na katumbansa ng Regional Minimum Wage na 435 pesos para sa dalawampung araw.
Ang mga magulang naman ng mga batang tinuturuang bumasa ay mayroong Daily Allowance na 235 pesos.
