KINASUHAN na ng Canadian prosecutors ng murder ang trenta anyos na residente ng Vancouver bunsod ng pagpatay sa labing isa katao, matapos araruhin ng minamaneho nitong SUV ang Filipino Community Festival sa Western Canadian City.
Ayon sa mga awtoridad, ang mga nasawi ay nasa pagitan ng limang taong gulang hanggang animnapu’t limang taong gulang.
Sa post sa X ng Vancouver police, si Kai-Ji Adam Lo ay sinampahan ng prosecutors sa British Columbia ng 8 counts of second-degree murder at may iba pang kaso ang inaasahang ihahain laban sa kanya.
Humarap si Lo sa korte, ilang oras matapos itong arestuhin ng mga police sa pinangyarihan ng insidente noong Linggo.
