PATULOY ang pagtaas ng bilang ng mga nasawi sa paglubog ng M/V Trisha Kerstin 3, makaraang isa pang bangkay ang narekober kahapon, dalawampu’t pitong araw makalipas ang trahedya sa karagatan ng Basilan.
Ayon sa Philippine Coast Guard (PCG), natagpuan ng technical divers ang katawan sa underwater operations, dahilan para sumampa na sa animnapu’t lima ang death toll.
Sa tala ng PCG, labing-apat pa ang nawawala habang 293 ang survivors.
Idinagdag ng PCG na ang latest figure ay consolidated mula sa PNP-Scene of the Crime Operatives, City Disaster Risk Reduction and Management Office, Coast Guard District Southwestern Mindanao, at mga apektadong pamilya na nakikipag-coordinate araw-araw sa Interagency Search and Rescue Authorities.




