Death toll sa Habagat, umakyat na sa 27, ayon sa PNP; pinsala sa agrikultura, sumampa na sa mahigit 1 bilyong piso

DALAWAMPU’T pito na ang bilang ng mga nasawi mula sa epekto ng Habagat, ayon sa PNP.

Sa press briefing, sinabi ni PNP Spokesperson Police Colonel Allen Rae Co na mula sa 27 fatalities, 26 ay sibilyan habang isa ay PNP personnel.

Aniya, mayroon ding 2 nawawala at 18 na nasugatan, as of 6 A.M., ngayong Aug. 17.

Wala pang ibinibigay na breakdown ang PNP kaugnay sa lokasyon at cause of death ng mga nasawi.

Patuloy naman ang police units sa pagtulong sa disaster response at sa pagmamantina ng peace and order sa mga lugar na apektado ng malalakas na pag-ulan.

Ayon sa Office of Civil Defense, mahigit limang milyong katao na ang naapektuhan ng pinagsamang epekto ng mga bagyo at Habagat.

Samantala, lumobo na sa 1.03 billion pesos ang halaga ng pinsala at nalugi sa pananalasa ng tuloy-tuloy na pag-ulan dulot ng Habagat at ng nagdaang mga Bagyong Luis at Maymay, ayon sa Department of Agriculture (DA).