NASA kustodiya na ng International Criminal Court (ICC) si Dating Pangulong Rodrigo Duterte kasunod ng pagdakip sa kanya sa kasong Crimes Against Humanity bunsod ng madugong war on drugs.
Kinumpirma mismo ng ICC ang pag-kustodiya nila kay Duterte, matapos lumapag ang chartered plane na kanyang sinakyan sa Rotterdan the Hague Airport.
Bago mag-landing, naglabas ng video statement ang Dating Pangulo, kung saan sinabi niya na pinamunuan niya ang mga pulisya at militar, at nangakong po-protektahan niya ang mga ito, kasabay ng pag-ako ng responsibilidad sa kampanya kontra iligal na droga.
Naniniwala naman ang ICC na naka-base sa Netherlands, na mayroong “reasonable grounds” para kasuhan si Duterte ng murder bilang Crimes Against Humanity, at bilang “Indirect Co-Perpetrator” sa Anti-Drug Campaign na kumitil ng libo-libong katao, batay sa pagtaya ng Right Groups.
