HINIHINTAY pa ng Department of Agriculture (DA) ang karagdagang guidance mula sa COMELEC bago mailunsad ang 20 pesos per kilo na bigas ngayong Linggo.
Ipinaliwanag ni DA Secretary Francisco Tiu Laurel Jr., na bagaman binigyan na ng exemption ng poll body ang proyekto ng ahensya mula sa election spending ban, kailangan din aniyang kumuha ng exemptions ang Local Government Units na magbibigay din ng subsidy sa project.
Sa ilalim ng naturang proyekto, unang ilulunsad ang bente pesos na kada kilo ng bigas sa Western, Central, at Eastern Visayas, gayundin sa Negros Island, dahil sa mataas na poverty incidence at sapat na stocks sa mga naturang lugar.
Tinaya ng DA na aabot sa 800,000 families o 4 million individuals sa pilot areas ang makikinabang sa mas murang bigas.
