Kamara, kinilala ang kabayanihan ng Boy Scout na nagligtas ng mga buhay sa Tacloban school shooting

IN-adopt ng Kamara ang congressional resolution upang kilalanin ang kabayanihan ng nasawing Boy Scout na si Chris Lorenz Fabian.

Pinuri ng mga mambabatas ang kanyang katapangan matapos niyang iligtas ang mga kapwa estudyante mula sa pamamaril sa kanilang paaralan sa Tacloban City noong Hunyo.

Pinagtibay ng mga kongresista sa pamamagitan ng voice vote ang House Resolution No. 1464 upang kilalanin ang pambihirang katapangan ni Fabian nang i-secure niya ang pintuan ng kanilang classroom sa kasagsagan ng pamamaril ng dalawang salarin sa San Jose National High School noong Hunyo 22.

Dalawang teenager na armado ng pistola ang walang habas na namaril sa paaralan, na ikinasawi ng tatlong estudyante, kabilang si Fabian, at ikinasugat ng 20 iba pa.