Sanggol, ipinanganak mula sa embryo na halos 31 taon nang naka-freeze

Isang nakakamanghang kwento ng siyensya at pag-asa ang naganap kamakailan sa Amerika matapos maipanganak si Thaddeus Daniel Pierce, isang sanggol na nanggaling sa embryo na na-freeze noong taong 1994. Ipinanganak siya nito lamang ika-26 ng Hulyo 2025—matapos ang halos 31 taon ng pagkakaimbak sa cryogenic freezer. Ang embryo ay na-freeze noon pa bago pa nagkaroon ng widespread internet o social media, at ngayon ay nabigyan ng bagong buhay.

Ang embryo ay orihinal na mula sa IVF treatment ni Linda Archerd. Hindi niya ito nagamit at naiwan sa storage nang mahigit tatlong dekada. Sa halip na ipa-dispose, pinili ni Linda na i-donate ang embryo sa ibang pamilyang nangangarap ng anak. Sa tulong ng embryo adoption program na Snowflakes, napunta ang embryo kina Lindsey at Tim Pierce, isang mag-asawa mula Ohio na matagal nang gustong magkaanak pero nahirapan sa natural na pagbubuntis.

Tatlong embryos ang ipinadala mula Oregon patungo sa isang fertility clinic sa Tennessee. Isa lang ang matagumpay na na-thaw, at ito ang inilagay sa sinapupunan ni Lindsey. Nagtagumpay ang embryo transfer at naging maayos ang buong pagbubuntis. Isinilang ang isang malusog na baby boy na ngayon ay kinikilalang may hawak ng bagong record bilang isa sa pinakamatagal na naka-freeze na embryo na nauwi sa successful birth.