Mga patakaran sa pagsunod ng mga kampo sa impeachment case laban kay VP Sara Duterte, inilatag

INILATAG ni Senate Impeachment Court Presiding Officer Francis Chiz Escudero ang mga patakaran para sa pagsunod sa Rule 18, partikular sa pagbabawal sa mga covered nito na magkomento sa publiko tungkol sa merits ng impeachment trial ni Vice President Sara Duterte.

Ayon kay Escudero, maituturing na pagtalakay sa merits ng kaso kung ang isang public statement ay sumusuri sa disputed facts, credibility ng testigo, relevance o bigat ng ebidensya, legal viability ng impeachment charge o depensa, nagtataguyod ng partikular na hatol, o nag-aanunsyo o nagtataya ng magiging boto.

Sinabi ni Escudero na ipatutupad ng impeachment court ang two-strike rule para sa mga lalabag sa patakaran. 

Para aniya sa unang paglabag, magkakaroon muna ng public reprimand at admonition na magiging bahagi ng permanent record bilang final warning.

Para sa ikalawang paglabag, papatawan ng multang hanggang P30,000 kada paglabag, alinsunod sa itinakdang ceiling ng rules.