Sobra 4,000 nga mga low-income earners sa Eastern Visayas an pwede makatagamtam san Pambansang Pabahay Para sa Pilipino o’ 4PH program san gobyerno.
Sa ginbuhat nga Kapihan sa Bagong Pilipinas, iginsumat ni Department of Human Settlements and Urban Development o’ DHSUD Regional Director Michael Victor Tezon nga an 4PH program in may panuyo ma-solbar an problema sa pabahay sa nasud.
Dinhe sa Eastern Visayas, naka-linya na an mga proyekto sa Ormoc City; MacArthur ngan Mahaplag, Leyte; Catbalogan City, Samar; ngan Guiuan, Eastern Samar.
Iginpahayag pa ni Director Tezon nga an 4PH program in ginpondohan san private housing developer pero supervised san DHSUD.
Para maka-tagamtam sine nga proyekto, an beneficiary in dapat first-time home buyer ngan miyembro san Pag-IBIG sa sulod sin duha ka tuig, may-ada supesyente nga kinada-bulan nga income, waray utang sa Pag-IBIG, ngan diri masobra 70 anyos an edad antis matapos an loan maturity.
Iginpahayag pa ni Director Tezon nga mas barubarato an P3,000 monthly amortization para ma-angkon an housing unit.
Ine in mas barubarato kun mag-rerenta sin balay ngan kun makuha sa private housing developers.
