Bangkay ng nawawalang mangingisda, natagpuan sa baybayin ng Eastern Samar

NAREKOBER ang katawan ng mangingisda na unang napaulat na nawawala sa baybayin ng Barangay Cansiledes, Hernani, Eastern Samar.

Kinilala ang biktima na si Anthony Flores, limampung taong gulang, residente ng Barangay Naubay sa bayan ng Laurente.

Ayon sa report ng Police Regional Office (PRO) 8, unang napaulat na nawawala si Flores matapos pumalaot kasama ang bente singko anyos na si Ian Allestre noong Jan. 2, sa kasagsagan ng masamang panahon dulot ng Shear Line.

Nasagip si Allestre ng mga residente sa Barangay Alog sa Salcedo noong Jan. 5 matapos madiskubreng palutang-lutang sa karagatan sa loob ng labintatlong oras.