Tikang Oktober 18, 2023, mahihimo na nga makapalit san iba-iba nga produkto sa umhanan an mga Calbayognon san mas barato nga presyo.
Ini in tungod kay pag-aabrihan na an Bagsakan Center sa Brgy. Amampacang sa distrito san Tinambacan diin igbabaligya an mga farm products tikang mismo sa Brgy. Lungsob United Farmers Association o LUFA ngan Brgy. Dinagan Farmers Association o DUFA.
Sumala san informasyon nga nakuha san IR News tikang kan Ms,. Rowena Juanillo, Program officer san Western Samar Development Foundation o WESADEF, sobra na san pankalugaringon nga kunsumo san mga mag-uuma sini nga mga barangay an ira farm products sanglit mahihimo na nga igbaligya ngada sa publiko.
Ungay sini nga mga produkto mao an fresh farm eggs (white and brown); mga kakanin sugad san sinarongsong, biko, inaklob, banana chips ngan taro chips; papaya pickles, salabat ngan turmeric powder, native chicken, lechon baboy, fresh vegetables ngan damo nga iba pa.
Mahinunumduman nga masobra usa katuig na an nakalabay, nagin benipisyaryo an nasabi nga duha nga mga barangay san livelihood project san usa nga German Foundation nga iginpaagi ug igin-implementar san WESADEF, upod san tambulig san mga ahensiya san gobyerno sugad san City Agriculture ngan City Veterinary Office.
Panuyo san nasabi nga proyekto nga mapa-uswag an kamutangan ngan madugngan an kita dire la san parag-uma kundi lakip san iya pamilya ngan bug-os nga komunidad, ngan yana nakikita na an produkto san proyekto.
Sumala pa kan Juanillo, panuyo liwat san pagtukod nira san Bagsakan Center mao an pag-engganyar san mga parag-uma nga mananum pa ngan mag-ataman san mga farm animals sugad san pato, baboy ngan manok tungod kay may-ada na sigurado nga merkado o pagbabaligyaan san ira mga produkto san tama nga presyo, ngan dire na maagi san igintatawag nga middle men, nga mao an nakaka dugang san pagmahal san presyo san mga papliton.
(Eleen Lim)
