SUSPENDIDO ang klase at pasok sa trabaho sa City Hall sa lungsod ng Maynila sa January 9 na kapistahan ng Poong Nazareno.
Inanunsyo ni Manila Mayor Isko Moreno Domagoso ang suspensyon sa bisa ng nilagdaang Executive Order No. 1.
Tuloy naman ang trabaho ng mga nasa frontline services gaya ng peace and order, public services, traffic enforcement, disaster risk reduction, at health services.
Samantala ang suspensyon ng trabaho sa mga National Government Offices at pribadong kumpanya sa Maynila ay ipinaubaya ng alkalde sa kani-kanilang pamunuan.
Nilagdaan din ni Domagoso ang Executive Order No. 2 na magpapatupad ng Liquor Ban sa January 9 sa loob ng 500-meter radius ng Quiapo Church at sa rutang daraanan ng Traslacion.
Ipagbabawal din ang pagbebenta, pagpapakalat at paggamit ng paputok at iba pang pyrotechnic devices simula sa January 8 hanggang 9 sa buong lungsod.
Samantala, nais ng National Capital Region Police Office (NCRPO) na magpatupad ng Liquor Ban at Temporary Suspension ng Permits to Carry Firearms para matiyak ang seguridad sa Traslacion sa pista ng Hesus Nazareno sa Biyernes.
