Apat ang patay, kabilang ang isang apat na taong gulang na lalaki, makaraang araruhin ng 16-wheeler truck ang tatlong motorsiklo sa kanto ng Ortigas ave. at Lanuza Ave., ayon sa Pasig City Police.
Tatlo sa mga nasawi ay miyembro ng isang pamilya, kabilang ang batang lalaki, habang ang isa pang biktima ay driver ng isa pang motorsiklo.
Sinabi ng Pasig Police na dalawang iba pa na nagtamo ng bali sa braso at tadyang ang sumasailalim pa sa gamutan, habang ang isa pang motorcycle rider ay na-discharge na mula sa ospital.
Kargado ng libo-libong sako ng bigas ang 16-wheeler truck nang mawalan umano ito ng preno, at lumihis pakanan saka sinalpok ang mga nasa harapan nitong mga motorsiklo bago tuluyang tumagilid.
Nahaharap ang driver ng truck sa reckless imprudence resulting in multiple homicides, multiple serious injuries, at multiple damage to property.
