4 na estudyante, kinasuhan ng PNP dahil sa fake bomb threats sa Eastern Samar

KINASUHAN ng PNP ng kaso ang apat na estudyante dahil sa paglabag sa anti-bomb joke matapos magpakalat ng false bomb at gun threats sa isang paaralan sa Eastern Samar.

Sa press briefing, sinabi ni Regional Police Office – Eastern Visayas Spokesperson Lt. Col. Analiza Armeza na ang paghahain ng kaso laban sa mga estudyante, edad kinse pataas, ay paraan ng mga awtoridad na maresolba ang mga pekeng pagbabanta.

Isinampa ng Borongan City Police Office noong Aug. 7 ang kasong paglabag sa Presidential Decree 1727, na nagpapataw ng parusa sa pagkakalat ng maling impormasyon tungkol sa bomb threats at mga kahalintulad na panloloko na maaaring magdulot ng public alarm at ma-trigger ang security response.