Mayorya ng mga Pinoy, suportado ang impeachment process laban kay VP Sara, ayon sa survey

MAYORYA ng mga Pilipino ang sumusuporta sa impeachment process laban kay Vice President Sara Duterte.

Batay ito sa resulta ng pinakahuling tugon ng masa survey ng OCTAResearch na isinagawa mula March 19 hanggang 25 sa 1,200 respondents.

Lumitaw na 69 percent ng mga Pinoy ang naniniwalang dapat isagawa ang impeachment process upang matalakay ang mga alegasyon laban sa bise presidente. 

Nasa 28 percent naman ang hindi sumasang-ayon sa impeachment process habang tatlong porsyento ang undecided. 

Ang pinakamalaking bahagi ng pabor sa impeachment ay mula sa Visayas na naitala sa 83 percent, sinundan ng National Capital Region, 81 percent, at nalalabing bahagi ng Luzon, 69 percent.