PORMAL na nga guin abrihan san Office of the Ombudsman an ira 6th Ombudsman Assistance Center (OAC), adlaw san Martes, March 18, 2025 sa ciudad san Calbayog.
An OAC in aada nahimumutang sa sulod san Calbayog City Police Station, Terminal Site sa Barangay Bagacay.
Andam an nasabi nga center para kumarawat san complaints, Statements of Assets, Liabilities, and Net Worth, ngan pag-proseso san Ombudsman clearances. An ira opisina abri tikang alas 8:00 san aga ngada alas 5:00 san kulop, Lunes ngada Biyernes, labot la kun holiday.
Guin tikangan an aktibidad pinaagi san ribbon-cutting ceremony nga iguin pangunahan ni Atty. Philip C. Camiguing ngan Atty. Janice G. Gabrito, Police Lieutenant Colonel Dinvir L. Revita, ngan Fr. Roger Oñate.
Kaupod liwat dida san aktibidad si OMB OAC support staff: Ma. Anna Lisa J. Mendez ngan Noel S. Maguad.
An pag-abri san nasabi nga center in magreresulta san pagpapalambo san mga servicio san Ombudsman sa Sinirangan Visayas.
An iba pa nga Ombudsman OAC offices in nahimumutang sa mga Malls sa Pasay City, Roxas City, Tuguegarao City, Zamboanga City, ngan Patikul, Sulu.
