Tatlo ang naitalang sugatan makaraang masunog ang isang speed boat sa katubigan ng Zamboanga City.
Ayon sa incident report ng Philippine Coast Guard (PCG) nasunog ang “FADI LAMINUSA EXPRESS” na may lulang tatlong katao, Huwebes (Aug. 17) ng hapon.
Umalis ang nasabing speedboat sa Tres Marias, Baliwasan Seaside, Zamboanga City para sumailalim sa sea trial nang mapansin ng isa sa mga crew ang apoy sa bahagi ng fuel tank at battery nito.
Agad rumesponde ang mga tauhan ng Coast Guard at naapula ang apoy gamit ang mga fire extinguishers. Agad namang nilapatan ng lunas sa Coast Guard Medical Clinic-Southwestern Mindanao ang tatlong nailigtas na crew na pawang nagtamo ng first-degree burns.
