Misteryosong ‘Doomsday Fish’ muling namataan, pinangangambahang may dalang babala ng lindol o tsunami

Sunod-sunod na napapadpad sa baybayin ng iba’t ibang bansa ang bihirang isdang oarfish na kilala rin bilang “Doomsday Fish.” Sa India, Australia at California, ilang malalaking oarfish ang nakita nitong mga nakaraang linggo, na muling nagpasigla sa lumang paniniwala na ito raw ay nagdadala ng babala ng lindol o tsunami.

Ang oarfish ang itinuturing na pinakamahabang isdang may buto sa buong mundo. Umaabot ito ng hanggang sampu o labing-isang metro ang haba at karaniwang naninirahan sa napakalalim na bahagi ng karagatan. Bibihira itong makita nang buhay o malapit sa dalampasigan, kaya’t kapag lumitaw ito, agad na nauugnay sa mga alamat at kababalaghan.

Sa Japan, matagal nang pinaniniwalaan na ang oarfish, o tinatawag nilang Ryugu no tsukai, ay sugo ng Diyos ng Dagat na nagbibigay-babala kapag may paparating na malakas na lindol o sakuna. Noong 2011, ilang mangingisda ang nagsabing may mga oarfish na lumitaw bago ang mapaminsalang lindol at tsunami sa Tōhoku.

Ngayong taon, isang oarfish ang nahuli ng mga mangingisda sa baybayin ng India, habang may namataan ding buhay na oarfish na kinuhanan ng video ng mga diver sa Australia. Sa California, dalawang magkahiwalay na insidente ng oarfish na napadpad sa dalampasigan ang naiulat, dahilan para magdulot ng takot at haka-haka sa ilang residente.