Inatasan ng Korte Suprema si Vice President Sara Duterte na sagutin ang petisyon na kumukwestiyon sa ligalidad ng 125 million pesos na Confidential Fund (CF) ng Office of the Vice President noong 2022.
Bukod sa bise presidente, inatasan din ng Supreme Court sina Executive Secretary Lucas Bersamin at Budget Secretary Amenah Pangandaman na magkomento sa naturang usapin.
Hindi pa inaaksyunan ng Korte Suprema ang petisyon dahil kailangan muna nitong makuha ang panig ng respondents na bahagi ng proseso.
Sampung araw ang ibinigay ng kataas-taasang hukuman sa mga respondents para magsumite ng kani-kanilang komento sa petition for certiorari na inihain ng petitioners sa pangunguna ni dating COMELEC Chairman Christian Monsod.