Inaprubahan ng United States Government ang mahigit 25,000 metric tons ng karagdagang raw sugar allocation mula sa Pilipinas na maaring pumasok sa Amerika ngayong Fiscal Year 2024 o simula Oct. 1, 2023 hanggang Sept. 30, 2024.
Sa statement, sinabi ng US Trade Representative (USTR) na mula sa karagdagang 125,000 Metric Tons Raw Value (MTRV), 25,300 ang inilaan sa Pilipinas.
Bukod pa ito sa 145,235 MTRV in-allocation na unang inanunsyo ng USTR para sa Pilipinas ngayong fiscal year.
Sa ilalim ng MTRV allocation scheme ng Amerika, pinapayagan ang mga bansa na mag-export ng itinakdang dami ng isang produkto sa US sa mas mababang taripa.
